(۱)    دلي سجاد

 

- مه...مه...ميم...م (مريم) ،

 س...سنته...آك...آك...س...س...سچاتي...اؤ...اؤ...اؤپ...پ ( سن ده آغا سجادي اؤپ ) .

باقلي دار كوچه نين ديبين ده ، ميرم گيلين قاپيسين دا ، سجاد ايكي دنه قاريشقاني الين ده توتوب اؤپوشدوروردو !

يئرين گورولتوسونو سجاد دوياراق ، دالين دووارا وئريب گؤزلري يئرده كي قاريشقالارا تيكيلدي .

بو حال دا مريم گيلين قونشولارينين قاپيسي سيلكه له نه رك آچيليب ، ايكي دنه اوغلان وحشت له كوچه چيخيب ،

گن كوچه يه ساري قاشدي لار. سجاد باخيشي لا اولاري ايزلييركن مريم گيلين قاپيسي دا آچيليب ، مريم هؤيول كوچه يه چيخدي .

اوتاي دان دا ايكي اوغلانين آناسي .

كوچه نين باشين دان قوزانان شاققيلتي، مريمي و اول آناني نئچه لحظه ليك دايانديغي يئرلرين ده ديسكينديريب قوروتدو . آنا قيشقيريب كوچه باشينا ساري قاچدي .

مريم ايسته دي ائولرينه  قئييتسين كي  سجاد دورتمه گي له  اونون قولتوغو  آلتين دان ووروب ، اودا اوزو قويلو يئره چيرپيندي.

*

اون يئتدي  ساهات دان  سونرا مريمين آناسينين يالوارماسينا  گؤره نئچه  جاوان گليب  كوچه نين  باشين دان باشلادي لار اوچان دووارلارين داش تورپاغين يانا وورماغا كي شايد مريمين جنازه سين تاپسين لار .

بير آز گلميشدي لر  كي ايكي باش دان آياغا گؤيرميش  اوشاق جنازسين چئكدي لر  ائشيگه . ياحسين سسييدي كي عرشه اوجاليريدي .

بير آزدان سونرادا آغزينا تورپاق دولموش بير آناني تاپاراق بير قوجامان كيشي حالدان گئتدي .

مريم گيلين قاپيسينا ياخينلاشاركن  بير چومبره وورموش  جنازه اوزه چيخدي .

جاوان لارين بيريسي ياواش جا يانين داكينا دئدي : دلي سجاد .

قولتوق لارين دان  توتوب  چئكدي لر  ائشيگه .

- اوه . . . اوه . . .

بوغولموش اوكسورمه سسيني دويدولار  آمما تؤز تورپاق آلتين دان  بير زات بيلينميردي .

سجادين جنازه سين دالي اوسته داش تورپاق اوستونه اوزانديراراق  جاوان لارين بيريسي  اؤز اؤزونه دئدي : يا علي ! ! !

اگيليب مريمي آلدي اللري اوستونه اوجادان چيغيردي : يا علي . . .

ياعلي ياعلي دئيه دئيه مريمي يئتيردي لر آمبولانسا .

*

بير قوجامان كيشي و اون يئتدي ياشين دا اولان قيزي ، اوچ دنه تؤز تورپاقلي جنازه ني سيلكه له مك ده .

بير دنه ده قاريشقا سجادين گولوشلو دوداغين دا گزمك ده !